Pas përfundimit të afatit për aplikimet në skemat kombëtare të mbështetjes për bujqësinë, në qarkun e Korçës janë regjistruar gjithsej 12 240 aplikime nga fermerët për të gjitha skemat e ofruara nga qeveria shqiptare.
Aktualisht, specialistët e Agjencisë Rajonale të Ekstensionit Bujqësor (AREB) Korçë janë duke zhvilluar procesin e verifikimit të dokumentacionit, i cili do të pasohet nga kontrolli fizik në terren për aplikimet e kualifikuara.
Sipas Vullnet Gjollës, Drejtor i AREB Korçë, interesi i fermerëve ka qenë i lartë dhe në linjë me vitet e kaluara, veçanërisht për skemën e naftës, por janë bërë aplikime edhe për skema të tjera mbështetëse.
“Numri i aplikimeve është pothuajse i njëjtë me një vit më parë, gjë që tregon qëndrueshmëri në nevojat dhe kërkesat e fermerëve për mbështetje,” – u shpreh Gjolla.
Drejtori i AREB theksoi se vetëm fermerët që kanë dokumentacion të plotë dhe që rezultojnë të rregullt pas kontrollit fizik, do të përfitojnë nga masat për të cilat kanë aplikuar. Procesi i pagesave do të nisë pas përfundimit të të gjitha fazave të verifikimit dhe aprovimit të aplikimeve.
Kjo është pjesë e politikave të vazhdueshme të qeverisë për të mbështetur bujqësinë dhe për të fuqizuar sektorin rural në nivel lokal dhe kombëtar.
