Në skenën e Teatrit “Andon Zako Çajupi” në Korçë, aty ku ka kaluar thuajse gjithë jetën artistike, aktori dhe regjisori i njohur Guri Koço ka sjellë recitalin “50 pa 1”, një homazh për 51 vite të mbushura me art, emocione dhe kujtime.
Ky nuk ishte thjesht një rrëfim artistik, por një udhëtim emocional përmes roleve, kujtimeve dhe reflektimeve të një prej figurave më të dashura të skenës shqiptare. Me zërin e tij karakteristik dhe batutat që e kanë bërë të paharrueshëm, Koço ndau me publikun një pjesë të shpirtit dhe historisë së tij në teatër.
Për këtë rrugëtim të jashtëzakonshëm prej mbi pesë dekadash, Këshilli i Qarkut të Korçës i akordoi një Certifikatë Përkushtimi, në vlerësim të kontributit të tij të çmuar në jetën artistike të qytetit.
Guri Koço mbetet një ikonë e gjallë e Teatrit të Korçës, një zë që ka formuar breza të tërë artistësh dhe një figurë që publiku e ka ndjekur dhe duartrokitur gjithmonë me dashuri.
