Në stadiumin “Air Albania” për të ndjekur Tirana-Skënderbeu ishin mbi 2000 tifozë. “Panorama Sport” ju sjell të gjitha pikantet.
Tirana del e para në nxemje, ndërsa menjëherë pas tyre edhe korçarët. Skuadrat stërviten me dritën natyrale, pasi kursehen dritat, që ndozen pak minuta më vonë. -Në tribunë, Jaku që vazhdon i dëmtuar, ndërsa Meta në stol. Jashtë skuadre si zakonisht Kozi.
Nga minuta e parë, Prengaj që dy ndeshjet e fundit i kishte nisur nga stoli. Ai rezultoi deciziv për bardheblutë.
Shumë pak tifozë korçarë ndjekin ekipin e tyre në tribunën e miqve.
Stafi teknik i federatës si zakonisht ndjek sfidën Tirana-Skënderbeu.
Për Shkëmbin, surprizë në stadium, familja dhe vajzat që i urojnë fat për ndeshjen. -Dy presidentët e skuadrave, në tribunë për të ndjekur sfidën e djeshme.
Shkëmbi proteston ashpër për një goditje të Bismark me bërryl ndaj Micit, por Jorgji mendon se faulli është i mbrojtësit të Tiranës.
Bardheblutë janë grumbulluar vetëm të dielën, në prag të sfidës me korçarët.
Si zakonisht tymuese dhe shashka gjatë sfidës së djeshme me tifozët bardheblu që e bëjnë festën gjatë lojës. Në fund skuadra feston me ndeshjen fitoren e parë sezonale.
Pesë “ish”-ë në ndeshjen e djeshme, por tre në stol dhe dy në fushë. Mici, Shkëmbi, Lilaj dhe Gvozdenoviçi e Doka.
Jorgji nuk jep një faull në favor të Skënderbeut te hyrja e zonës së Tiranës. Trajneri i Skënderbeut çmendet për vendimin e elbasanasit.
Në pjesën e dytë Shkëmbi kthen mbrojtjen me 4, duke larguar Micin nga fusha. Zgjidhje taktike edhe pse kapiteni po luante mirë.
Prengaj shënon golin e dytë dhe shkon të festojë me Shkëmbin. Trajneri si asnjëherë tjetër feston si i çmendur golin që i dha fitoren e parë.
Dy ndërrime të detyruara për Tiranën, Soler dhe Zharmuni dëmtohen gjatë sfidës. Gjithsesi në ditët në vazhdim do të shihet gjendja e lojtarëve.
Gjatë nxemjes dhe 10 minuta para se të niste loja, Jonuzi nxjerr shpatullën. Ndërhyjnë mjekët e bardhebluve dhe i çojnë shpatullën nga vend. Lojtari futet në fushë dhe luan rregullisht 90 minuta, madje duke mbajtur shiritin e kapitenit.
Sherr në fund mes Alias, Dumfur dhe Bajroviçit, por edhe lojtarëve të tjerë. Dyshja kapet për fyti dhe të dy ndëshkohen me të verdhë, ashtu si edhe Jonuzi.
Tirana kthehet te fitorja zyrtare pas 4 muajsh e 19 ditësh. Triumfi i fundit shënohej në kampionatin e shkuar.
Në një moment të lojës, Gjumsi dëmtohet, ndërsa Jorgji urdhëron futjen e barrelës. Alla nuk jep lejen dhe kjo bën që dy gjyqtarët të përplasen, me të katërtin duke iu hakërryer e bërtitur: “Sill barrelën”.
Kryesori i FIFA-s i shkon afër Allës dhe sërish i thotë se çfarë nuk kupton, por më pas lojtari çohet dhe situata qetësohet dhe me Jorgjin që këshillon Gjumsin.
-Rimal Haxhiu largohet vetëm nga stadiumi, ndërsa pjesa më e madhe e ekipit merr autobusin për në hotel.
