“Sot gjendem në Lumalas, aty ku pikërisht katër vite më përpara Kryetari i bashkisë së Korçës ka premtuar ngritjen e një aeroporti. Nga aeroporti imagjinar i Lumalasit unë ju bëj thirrje që është koha për ndryshim, e ndryshimi është në duart tuaja,”- është shprehur kandidatja për kryetare bashkie nga koalicioni Bashkë Fitojmë, Ledina Alolli.
Për vite me radhë ky aeroport është premtuar se do të ndërtohej e vihej në funksion ndërsa nuk kanë munguar as studimet, por pa mundur të konkretizohet asgjë edhe për shkak te investimit që kërkon shuma të mëdha.
Ndryshe nga synimi fillestar për një aeroport të mirëfilltë, bashkia e Korçës ka nisur punën për një aeroport me pistë bari për avionët e vegjël deri në 12 vende ndërsa punimet po bëhen nga forcat e ushtrisë dhe pritet që brenda një muaji të nisë funksionimi.
Aeroporti i Lumalasit do të ketë një pistë me 2.4 km gjatësi si dhe hapësirë për qendrimin e avionëve të vegjël ndërsa synohet që të shërbejë për turizëm dhe aktivitete sportive.
