Intensifikohen kontrollet në pikat kufitare të qarkut Korçë, pas identifikimit të rastit të parë të murtajës së bagëtive të imta në fshatin Shuec të Devollit.
Si pjesë e këtyre masave të shtuara, një shtetas u arrestua në Pikën e Kalimit Kufitar të Kapshticës, pasi u kap duke tentuar të fuste në territorin shqiptar disa dele pa dokumentacionin përkatës shoqërues nga Greqia.
Gjatë kontrollit nga shërbimet e Policisë Kufitare, në automjetin e tij u gjetën disa bagëti të imta, të cilat më pas iu dorëzuan autoriteteve veterinare për të kryer analizat e nevojshme dhe për të përcaktuar nëse janë të prekura nga ndonjë sëmundje infektive.
Shtetasi, i identifikuar me inicialet K.F., u arrestua dhe do të përballet me akuzën për “kontrabandë me mallra të licensuara”.
Drejtoria Vendore e Kufirit dhe Migracionit në Korçë njofton se kontrollet do të vijojnë me intensitet në të gjitha Pikat e Kalimit Kufitar, me qëllim parandalimin e futjes së bagëtive të imta në mënyrë të jashtëligjshme.
