Sezoni i korrjeve ka filluar në Fushën e Maliqit, një nga zonat kryesore bujqësore të juglindjes së vendit. Aktualisht, po korrën sipërfaqet e mbjella me elb, dhe prodhimi deri tani shihet premtues.
Fermerët deklarojnë se cilësia e elbit është e mirë dhe se rendimenti këtë vit është më i lartë krahasuar me një vit më parë, falë kushteve të favorshme klimatike gjatë periudhës së pjekjes.
Megjithatë, sezoni i sivjetshëm shënon një ulje të sipërfaqeve të mbjella me drithëra. Këtë vit janë kultivuar rreth 200 hektarë më pak me grurë krahasuar me vitin e kaluar, një tendencë që lidhet me kostot e larta të prodhimit dhe mungesën e mbështetjes financiare direkte për bujqit.
Banorët e zonës shpresojnë që procesi i korrjeve të vazhdojë pa pengesa dhe bëjnë apel që shteti të ofrojë mbështetje më konkrete me subvencione, në mënyrë që prodhimi vendas të mos pësojë rënie në vitet në vijim.
