Ndeshja ndaj Teutës është vendimtare për ecurinë e gjithë sezonit për Skënderbeun, ndaj dhe të gjitha energjitë e korçarëve janë përqendruar aty.
Është një ndeshje shtëpie, që ata nuk mund ta shpërdorojnë dhe nuk mendohet tjetër rezultat veç fitores. Skënderbeut është në vend të fundit dhe vetëm trepikëshi kundër durrsakëve do të shërbente për të përmirësuar si renditjen, ashtu edhe moralin.
Trajneri Ernest Gjoka gjatë gjithë javës u ka kërkuar lojtarëve të heqin presonin dhe të mendojnë vetëm për ndeshjen e radhës, ku fitorja është e vetmja rrugë për të dalë nga kriza. Në çdo seancë stërvitore stafi teknik nuk ka toleruar asgjë nga ato çfarë ndodhën me Vllazninë, ku ekipi gaboi dhe u ndëshkua me 4 gola. Ka pasur jo pak kritika për qasjen e lojtarëve në atë takim, trajneri Gjoka ka kërkuar përgjegjshmëri për pjesën e mbetur të kampionatit, duke nisur nga sfida me Teutën.
Ai e ka bërë të qartë se edhe barazimi nuk vlen në këtë ndeshje. Stafi teknik i korçarëve është në dilemë për zëvendësuesin e Randit, i cili ka plotësuar numrin 4 të kartonëve dhe është i skualifikuar. Në vend të tij në qendër të mbrojtjes me shumë mundësi do të luajë Vaskez, që ka lënë pas dëmtimin dhe është i gatshëm për trajnerin bardhekuq.
MERKATO – Edhe pse në heshtje, duket se klubi korçar po lëviz për të plotësuar organikën e kërkuar nga trajneri Gjoka. Pas dy afrimeve të Estrelës dhe Lukinas, korçarët janë gati për të zyrtarizuar edhe tre përforcime të tjera.
Bëhet fjalë për një mbrojtës dhe dy lojtarë që luajnë në repartin e avancuar. Sipas drejtuesve të klubit korçar, këto afrime pritet që të sjellin eksperiencën dhe cilësinë e kërkuar nga trajneri.
Emrat nuk bëhen ende të ditur dhe mbetet të shihet, nëse do të jenë vërtet elementët që do ta ndihmonin Skënderbeun për të mbijetuar në Superiore, apo jo. E vërteta është se në merkaton e dimrit është shumë e vështirë për të gjetur lojtarë me kualitet që të jenë të lirë.
