Gjendja shëndetësore e Kryepeshkopit të Kishës Ortodokse Autoqefale të Shqipërisë, Anastas Janullatos, ka pësuar një përkeqësim të ndjeshëm mëngjesin e së premtes, për shkak se ka pësuar një dështim shumëorganësh.
Sipas raportimeve nga mediat greke, Kryepeshkopi vijon të jetë i shtruar në kujdes intensiv në spitalin “Evangelismos” të Athinës, ku ndodhet nën mbikëqyrjen e një ekipi të specializuar mjekësor.
Pavarësisht përpjekjeve të stafit mjekësor për ta shkëputur nga mbështetja mekanike e frymëmarrjes, procedura ka rezultuar e pasuksesshme.
Për këtë arsye, është kryer trakeostomia, një ndërhyrje mjekësore e domosdoshme për pacientët e intubuar për më shumë se 15 ditë, me qëllim minimizimin e rreziqeve të mëtejshme.
Kryepeshkopi Janullatos ka kaluar tashmë 20 ditë i shtruar në spital për shkak të komplikacioneve shëndetësore. Gjendja e tij vijon të mbetet kritike, ndërsa mjekët janë duke e monitoruar nga afër.
