Skënderbeu u mposht në shtëpi nga Pogradeci në ndeshjen e vlefshme për fazën e grupeve të Kupës së Shqipërisë. Me përjashtim të setit të dytë, të fituar lehtësisht nga liqenorët, tre setet e tjera dhuruan emocione të forta dhe rivalitet maksimal, ku gjithçka u vendos vetëm në pikët shtesë në setin e parë dhe të katërt.
Pogradeci tregoi qetësi dhe eksperiencë në momentet vendimtare, duke bërë diferencën pikërisht aty ku ndeshja kërkonte përqendrim maksimal. Fitorja 3-1 në Korçë konfirmon formën e mirë të ekipit liqenor dhe ambiciet e qarta për objektivat e sezonit.
Edhe pse këtë vit Pogradeci e mbyll pa trofe, pas humbjes së Kupës së FSHV-së dhe asaj të Pavarësisë, skuadra mbetet e fokusuar maksimalisht në synimet madhore: titullin kampion, Kupën e Republikës dhe Ligën “Gjergj Kastrioti”.
Trajneri Besnik Lisha ka në dispozicion një grup lojtaresh cilësore, të afta të bëjnë diferencën ndaj çdo kundërshtari, çka e bën Pogradecin një nga pretendentët kryesorë të këtij sezoni.
