Sezoni i vjeljes së qershive ka nisur në Qarkun e Korçës, një nga zonat më të njohura për kultivimin e këtij fruti, por këtë vit prodhimi është dukshëm më i ulët. Fermerët e fshatit Dvoran, një ndër zonat më të njohura për frutat e freskëta, raportojnë dëme të konsiderueshme të shkaktuara nga ngricat e muajit prill dhe breshëri, të cilat prekën pemët në fazën e lulëzimit.
Sipas tyre, dëmtimet e mëdha në pemëtoret e qershive, por edhe në ato të kumbullave dhe dardhave, kanë ndikuar drejtpërdrejt në sasinë e frutit të zhvilluar, duke ulur ndjeshëm rendimentin krahasuar me vitet e mëparshme. Për pasojë, edhe çmimi i qershive në treg pritet të jetë më i lartë këtë sezon.
Aktualisht, në Qarkun e Korçës janë mbjellë rreth 4,100 hektarë me drufrutorë, nga të cilët 3,600 hektarë janë me mollë, kultura dominuese në rajon, ndërsa pjesa tjetër përfshin qershitë, kumbullat dhe dardhat.
Fermerët shprehen se megjithë vështirësitë, janë të vendosur të vijojnë punën dhe presin mbështetje më të madhe për përballimin e humbjeve të shkaktuara nga kushtet atmosferike.
