Thatësirat dhe temperaturat e larta kanë shkaktuar ulje të nivelit të ujit në Liqenin e Prespës.
Organizatat mjedisore theksojnë nevojën për ndërhyrje urgjente nga Shqipëria, Maqedonia e Veriut dhe Greqia, tre vendet në të cilat përkufizohet liqeni.
Instituti Meteorologjik i Maqedonisë së Veriut ka raportuar se në të ardhmen, pritet të rriten temperaturat, ç’ka do të thotë se Liqeni i Prespës rrezikon të tërhiqet akoma më shumë.
“Niveli i ulët i ujit në liqenin e Prespës vjen fillimisht si pasojë e faktorëve natyrorë, thatësirat të cilat ishin të shumta, mungesa e shiut dhe një dimër i thatë. Gjithashtu, ne po dëshmojmë një rritje të temperaturave në këto vite”, është shprehur Atanas Ugrinovski, përfaqësues i Institutit Hidrometereologjik.
Zdravko Lazarevski, një banor i zonës ka ndarë shqetësimin e tij, lidhur me këtë problematikë.
“Nga viti 2018 e deri më sot, me ndryshimin e nivelit të ujit, liqeni është tërhequr të paktën 35-40 metra, krahasuar me vijën fillestare të ujit”, është shprehur ai.
Nga situata e krijuar në liqen, duket se janë prekur edhe bizneset. Boshko Dimovski, pronar i një lokali në bregun e liqenit është shprehur pesimist.
“Ka pak gjasa që Prespa do të zhvillohet në të ardhmen e afërt pasi liqeni po tërhiqet me shpejtësi. Ka baltë, llum dhe njerëzit po largohen. Ata vijnë, shohin ç’po ndodh dhe ikin”, ka thënë ai.
Duke qenë se tërheqja e liqenit sa vjen e përkeqësohet organizatat vendore, të shqetësuara kanë bërë thirrje për të parandaluar këtë fenomen.
“Ky është një problem shtetëror dhe një problem që prek gjithë rajonet që ndajnë bregun e liqenit, duhet të ndërmerret një aksion i përbashkët. Sidoqoftë, gjithçka reduktohet në mbledhjen dhe përgatitjen e planeve për masa të buta në vend që të zgjidhet ky problem alarmues”, tha Marija Eftimovska, përfaqësuese e “Ecogerila Prespa”.
Në vitet ’80, kisha e “Ëngjëjve” u zhyt nën ujërat e liqenit të Prespës në jug të Ballkanit, brigjet e të cilit ndahen nga Maqedonia e Veriut, Greqia dhe Shqipëria. Sot, kjo kishë është qindra metra larg bregut si pasojë e tërheqjes së ujit.
Liqeni i Prespës për nga formimi bën pjesë në tre liqenet tektonikë në Ballkan të pozicionuar në trojet shqiptare, dhe sipas madhësisë renditet në vendin e tretë, pas Liqenit të Shkodrës dhe atij të Ohrit.
