Prej disa ditësh, fshati Dishnicë në njësinë administrative Bulgarec, Bashkia Korçë, po përballet me një situatë të rënduar nga vatrat e zjarrit që vijojnë të jenë aktive. Flakët kanë përfshirë sipërfaqe të konsiderueshme me pyje dhe shkurre, duke shkaktuar dëme serioze në mjedis.
Ndërhyrja për izolimin e vatrave është përballur me vështirësi të mëdha për shkak të terrenit të thyer malor, që pengon hyrjen e mjeteve zjarrfikëse në zonat më të përfshira nga flakët. Pavarësisht kësaj, operacioni në terren po vijon me angazhim maksimal.
Në ndihmë janë vënë 87 forca në total, nga të cilat 45 janë efektivë të Forcave të Armatosura. Janë përdorur gjithashtu 9 mjete të ndryshme zjarrfikëse dhe ndihmëse, ndërsa strukturat e emergjencës po koordinojnë veprimet për të frenuar përhapjen e mëtejshme të zjarrit.
Temperaturat e larta dhe era e fortë kanë ndikuar negativisht në përpjekjet për izolimin e flakëve. Autoritetet vendore kanë kërkuar shtim të forcave në terren dhe vijojnë monitorimin nga afër të situatës, për të shmangur vatrat të përhapen më tej. Burime thanë se janë djegur sipërfaqe të mëdha.
